A ra gorna, ‘stu viernu ‘ntruvulata
De ‘na chjna arrummante,
Si cc’è rricota, mo l’acqua ‘nchiarata
De ‘sta jumara nostra murmurante.
‘U cielu si cce preja e, ccapusutta,
‘Na fila ‘e chjuppi si cce specchia ttutta.

Ccu ra cammisa a mmenza gamma azata,
Si cc’ è rricota e llava re linzola,
D’allegre lavannare ‘na murrata.
‘N cielu d’amure ‘na canzuna vola
E ll’accumpagna, fàttuse parola,
‘U cantu de ‘na zìula ‘nnamurata.

Ma mòredi ccu ‘nn’urtimu lamientu
L’amurusa canzuna cujjintara…
Allura, ‘a cchiù qquatrara,
Amprannu cumu vela cuntra vientu
‘A cammisa de sita chi rinchjara,
Dice a ra cchiù bbicina:
– Guarda, cammisa rara!
Guarda, cammisa fina!
L’ha ffilata ‘na fata,
L’ha ttissuta ‘nu ragnu,
E’ ttantu dilicata chi me spagnu,
Purzì, de le dunare ‘na guardata.

Chi sa de dduve vene!…
Me cape intra ‘nu pugnu.
Trappànnula, m’addugnu
Quale valure tene!
‘A manu chi ‘a ‘nsapuna
‘A strince e ‘u’ ssi nn’adduna.
Criju ca mancu l’acqua
‘A sente, mentre ‘a sciacqua.

‘U’ d’ha mmaniche, ‘un tènedi fadelle,
‘U d’ha spichìetti, lìefrichi, nimelle:
E’ nnu lippu, è ‘nnu velu trasparente…
Pare ffatta ccu nnente!
Ah, si nn’avèrad’una,
Pur’iu de ‘ssa manera,
Cumu me ricrijera!
Ma ‘na tanta furtuna
‘U’d’è ppe’ ‘nna quatrara
Ch’è nnata lavannara!

-E bbrava a Ccarulina!
– Le disse Ccatirina –
Se vide ca lavannu
Tridici misi l’annu,
Te si’ ffatta de pella dilicata,
Cumu ‘na signurina!
Iu, no! Sugnu ristata
‘Na lavannara vera
E ‘sta cammisa mia nu’ ra cancèra
Mmancu ccu ra cammisa de ‘na fata!

‘U’ bbene dde livante,
‘U’ bbene dde punente;
E’ rrustica, è ppuncente
Cumu ‘nu vessicante.
Ma è ffatta ccu jjinostra
De chista terra nostra
E ppe’ ra pella mia
E’ ‘nna galantaria!

‘U’ ll’ha ffilata ‘a fata,
‘U’ ll’ha ttissuta ‘u ragnu,
M’arriva a ru carcagnu,
Pare ‘nna cirma ujjata;
Ma de ‘ssa tua è cchiù mmeglia
Ch’armenu me cummeglia!

E puru ca me carda
E ‘un cape intra ‘nu pugnu,
Addura dde cutugnu
E ssa dde spicanarda!

Me ricuordu… Fo’ cota ccu ‘ste manu
a ‘nnu diestru luntanu;
Vulluta a ‘nna quadara
Ccu ll’acqua ‘e ‘sta jumara;
Manganata, filata,
De sira, ‘mparu ‘mparu,
Avanti ‘a vamparata
Cara ‘e ‘nu fuocularu.
A ‘nnu granne tilaru
Vinne ddoppu tissuta
E ppue vinne ttagliata,
E ppue vinne ccusuta.

Era ‘nnu palu l’acu,
‘U filu era ‘nnu spacu;
Ma cc’ èradi turciuta,
Cchiù fforte, ‘na spiranza :
Chilla chi, ‘n quatraranza,
Avimu tutte avuta.
E ra stipài a ‘nna cascia
De tavule d’apita,
De dduve, a ffrunte vascia,
Ccu mmie niscìu quannu niscivi zita.
‘N’uominu sulamente
E ru sule l’hau bbista;
‘A sita e ra battista
Nn’hàu ccanusciutu gente!…

Ma pue, quale durata
Tene ‘ssa vilittella?
A ra prima lavata
Li se scurcia ra pella,
Mentre, ppe’ qquantu fai,
‘Sta mia ‘u’ sse strude mmai!

Doppu vint’anni ‘e prova,
Guàrdala, ancora è nnova,
Ccu ttuttu ch’allivata
S’è ssupra ‘sta fadella
‘A cchiù ssanizza e bbella
De masculi nidata.

Ma, supra tuttu, penza
E ‘ste parole pisa a ra vilanza:
‘A sita èdi apparenza,
‘A jinostra è ssustanza.

‘Na ranocchia spurtiva,
Chi facìa ri sircizzi all’àutra riva,
L’accuse e re difise
D”e lavannare ‘ntise ,
E ddisse a Ccatirina :
– Ha ttuortu Carulina.
Iu nud’usu cammise;
Ma si vene ppe’ mmie puru ‘ssa vostra
Moda pazzisca de purtare panni,
Pûe priedicare, Catirì, cent’anni,
Ma ‘u’ mmi nne mintu una de jinostra,
Mancu si tu te scanni! –