‘A solita zampugna colarusa,
Ccu ra nive, è scinnuta a ra marina;
E, mmo, de vientu e dde lamientu chjna,
Sona ra ninna ad ogne pporta chjusa.
È ra santa Vijìlia de Natale.
Sona, zampugna! Sona ‘a Pasturale!

Sona! Pped’ogne nnota chi me porta,
Mo chjanu chjanu e mmo cchjù fforte ‘u vìentu,
Intra ‘stu core miu turnare sientu
Tutta ‘na vita chi cridivi morta,
E mmi s’acqueta ‘n core ogni tturmientu
E ppassu supra ad ogne ccosa storta.

Mentre staju ccussì, tra dormebbiglia,
Trase ru suonu duce de ‘na ‘ngaglia;
M’accarizza re ricchje, me rispiglia,
E mme porta, ccussì, cumu ‘na paglia,
Ppe’ fforza de va vide quale ‘ncantu,
A ttiempi ‘e mo luntani ‘un sse sa qquantu.

E, all’umbra de ‘na granne ciminera,
Viju ‘n ‘ardente, caru fuocularu;
‘Nu zuccu ‘ncarpinatu paru paru
Arde ccumu ‘na cima de jacchèra;
‘Ntuornu cce su’: ‘nna vecchjarella accorta
E Nnannu e Ttata. Mamma, no! M’è mmorta!

‘A vecchjarella mia, fusu e ccunocchja,
Fila ccumu sulìadi ‘n quatraranza;
Iu le zumpu cuntientu a re jinocchja,
Illa me cunta llesta ‘na rumanza…
E ra zampugna sona ‘n luntananza
E ri cumpagni mie le fàu ra rocchja.

Sona, zampugna! Pòrtame luntanu,
A ri tiempi filici ‘e quatraranza;
A Nnanna chi filava cchjanu chjanu
‘Ntramente me cuntava ‘nna rumanza;
A ru zuccu chi ardìa, ssempre cchjù cchjaru
Sutt’a camastra de ‘nu fuocularu!